感激前線物資組
琴日去咗荃灣 黃大仙 觀塘 旺角，基本上都係圍繞住條紅綠線行
邊到需要支援就去
去到夜晚已經身心疲倦
諗住去附近商場搵下嘢食但發覺好多都關咗門
唯有去返地鐵站坐低抖下
後來有個物資組妹妹好似見我好累好肚餓咁
竟然喺附近食鋪關哂底下能夠送上兩個KFC飯
即時感激佢，我坐喺地下慢慢食，第一次覺得KFC飯係咁好食
我一路食一路望住佢一個人打理成堆物資
打理得井井有條，分門別類，亦會主動問人需要啲咩
亦都純熟咁幫人包保鮮紙等等
令我由心敬佩
物資組真係對現場每個人都好重要
好多時侯都能夠雪中送炭
見到過往都少人讚下物資組
希望大家下次見到物資組嘅人真係比個讚賞
所有嘢都唔係必然
感謝感謝
其實去到現階段，大家一定要堅持
因為將會面對比以往更加多嘅挑戰同困難
就係言論
多咗事情發生 自然多左意見同睇法
特別係呢家所發生嘅事好多都係好新
未必人人可能短時間內消化得到同接受
身邊好多人可能會對你指責
可能上開嘅平台都出現一班叫你放棄嘅人
佢地想法可能好簡單，純粹唔想香港亂，最好唔攪到佢地
但記住，每當我地受到呢啲壓力挑戰時
不妨諗返起五年前雨傘點解會失敗
其中一樣嘢就係唔好亂香港!夠了!要停!
但諗下五年前雨傘失敗後，呢五年內嘅香港變成點
好多不公條例一條又一條通過
遊行數字大趺
發聲嘅人被割蓆而灰心
好多社運人被捕
社會好多問題一直惡化
如果今次再失敗
已經唔係好似呢五年內踏入「社運寒冬」咁簡單
試問發展到咁都失敗嘅話
咁呢一代嘅年輕人，仲點會企出嚟抗爭
我地呢一代同下一代係承受唔到個禍害
個失敗禍害遠比大家怕香港亂仲更加大
所以無論點都好，一日未達到我地訴求
我地都要堅持住
多想一想，多反思
感謝琴日罷工嘅你，別放棄
另外
我唔知啲彈係咪真係有毒
但我起碼每次食完彈都真係肚屙同埋身體出現紅疹
睇醫生都睇到我窮
醫生都叫我要停一停
個人長期高壓 免疫系統已經出現問題
我唔夠能每次出完都爆紅疹去睇醫生
我亦都相信前線都有呢個皮膚問題
唔知班前線有冇錢睇醫生或會唔會去睇
但如果有，請盡快求醫
(有人有義診服務架 - 杏林覺醒)
亦都因為咁，所以我都係時侯退返後少少
食抗敏藥食到個人好眼瞓
希望大家如果都有同一個情況
無論身體上或情緒上
都唔好死頂
休息是為了行更遠嘅路
比自己身心同情緒上要舒緩一下先可以繼續
最後
所有透過網訂嘅訂應該呢個星期內寄出
進度已經完成咗一半
我會寄出所有書當日再出POST通知大家!
抱歉抱歉!
Search